काठमाडौं । चीनको तिब्बतमा गएको ६ दशमलव ८ म्याग्निच्युडको शक्तिशाली भूकम्पमा परी मृत्यु हुनेको संख्या एक सय २६ पुगेको छ । भूकम्पका कारण कम्तिमा एक सय ८८ जना घाइते भएका छन् भने एक हजारभन्दा बढी घर क्षतिग्रस्त भएका छन् । भग्नावशेषमा च्याप्पिएकाहरुको खोजी र उद्धार कार्य जारी रहेकोछ ।
यूएस जिओलोजिकल सर्भेले भने भूकम्प ७ दशमलव एक म्याग्निच्युडको मापन गरेको छ । भूकम्पको केन्द्रविन्दु सर्वोच्च शिखर सगरमाथाबाट करीब ८० किलोमिटर उत्तरमा रहेको र भूकम्पको धक्का नेपाल, भुटान र भारतमा समेत महसुस गरिएको रोयटर्सले उल्लेख गरेको छ ।
चिनियाँ समयअनुसार बिहान नौ बजेर ५ मिनेट जाँदा नेपालको उत्तरपूर्वी सीमा नजिकै पर्ने चीनको सिगात्से स्वशासित क्षेत्रको टिंग्री काउन्टी केन्द्रविन्दु भएर उक्त भूकम्प गएको हो । भूकम्पको उद्गमविन्दु १० किलोमिटर गहिराइमा रहेको चाइना अर्थक्वेक नेटवर्क्सले जनाएको छ । उक्त भूकम्पपछि थुप्रै परकम्पन गएको जनाइएको छ । चिनिया राष्ट्रपति सी चिनफिङले उद्धार र राहतमा हरसम्भव प्रयास गर्न चिनियाँ अधिकारीहरुलाई निर्देशन दिनुभएको छ ।
भूकम्पको प्रभाव करिब ८ लाख जनसंख्या रहेको सिगात्से क्षेत्रभरि परेको जनाइएको छ । सिगात्से शहर तिब्बती बुद्ध धर्मका महत्वपूर्ण गुरु पन्चेन लामाको परम्परागत मुख्यालय भएको रोयटर्सले उल्लेख गरेको छ । भूकम्पका कारण सिगात्सेका सयौं घरहरु ध्वस्त भएको तिब्बत अग्नि तथा उद्धार कार्यालयले जारी गरेको भिडियोमा देखिएको छ । भारत निर्वासनमा रहँदै आउनु भएका तिब्बती धर्मगुरु दलाई लामाले घटनाप्रति गहिरो दु:ख व्यक्त गर्नुभएको छ । प्रमुख भौगर्भिक फल्ट लाइनमा पर्ने भएकाले यो क्षेत्रमा समय-समयमा भूकम्प जाने गरेको बताइएको छ ।
