नेपाल कम्युनिस्ट पार्टी (माओवादी केन्द्र) दुधौली नगर समितिको दोस्रो ऐतिहासिक नगर सम्मेलन भव्य रूपमा सम्पन्न भएको छ । कार्यक्रम पूर्व प्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ को प्रमुख आथिथ्यतामा सम्पन्न भएको हो।
सम्मेलनमा स्थानीय नेताहरू, कार्यकर्ताहरू तथा समर्थकहरूको उल्लेख्य उपस्थिति रहेको थियो । साथै नेकपा एपाले र नेपाली कंग्रेसका नेता तथा कार्यकर्ताहरुसमेत दोस्रो नगर अधिवेशनको अवसर पारेर माओवादी पार्टीमा प्रवेश गरेका छन् । कार्यक्रममा पुर्व प्रधानमन्त्री प्रचण्डले सम्बोधन गदै अब जनताको नजिक रहेर काम गर्ने प्रतिबद्धता जनाउदै जनताको पक्षमा काम गर्न पार्टी अझ सक्रिय हुने बताउनु भयो ।
गत शुक्रबार चैत १५ गते काठमाडौँमा भएको राजावादी आन्दोलन पूर्ण रूपमा नियोजित रहेको बताउनु भएको छ । उक्त घटनामा दुई जनाको मृत्यु समेत भएको थियो । जसको जिम्मेवारी पूर्वराजा ज्ञानेन्द्र शाह स्वयंले लिनुपर्ने अध्यक्ष प्रचण्डको भनाइ छ ।
आफ्नो पहिलो प्रधानमन्त्री कार्यकालमा ज्ञानेन्द्र शाहलाई जनताको आग्रहका बाबजुद दया गरेर छुट दिएको अध्यक्ष प्रचण्डले बताउनु भयो । हालको आन्दोलनले शाहको वास्तविक नियत स्पष्ट पारिदिएको बताए । अध्यक्ष प्रचण्डले समाजवादी र राजावादी सभाको फरक स्पष्ट पार्दै समाजवादीहरूको सभा अनुशासित रहेको तर राजावादीहरूको सभा हिंसात्मक र अराजक भएको टिप्पणी गर्नु भयो ।
उक्त आन्दोलनको क्रममा भएको हिंसात्मक घटनालाई जनताले गम्भीर रूपमा लिएको भन्दै अध्यक्ष प्रचण्डले आगामी दिनमा यस्ता अस्थिरता मच्चाउने प्रयासहरूलाई जनताले नै निरुत्साहित गर्ने विश्वास व्यक्त गर्नु भयो ।
कार्यक्रममा वक्ताहरूले कम्युनिस्ट आन्दोलनको सुदृढीकरण, नगरस्तरमा पार्टी संगठन विस्तार तथा जनहितका विषयमा विस्तृत छलफल गरेका थिए । कार्यक्रमको आयोजना नेपाल कम्युनिस्ट पार्टी (माओवादी केन्द्र) दुधौली नगर समितिले गरेको थियो भने सम्मेलनमा विभिन्न वक्ताहरूले पार्टीको भावी रणनीति र जनतासँगको सम्बन्धलाई अझै बलियो बनाउन विभिन्न विषयमा छलफल गरेका थिए ।
