सिन्धुली । सिन्धुलीमा चाडपर्व लक्षित सवारी दुर्घटना न्युनिकरणका लागि सवारी चालकलाई प्रतिवद्धता गराउन सुरु गरीएको छ । जिल्ला प्रहरी कार्यालय सिन्धुली र जिल्ला ट्राफिक प्रहरी कार्यालय सिन्धुलीले चालकहरुलाई प्रतिवद्धता गराउन सुरु गरेको हो ।
जिल्ला प्रहरी कार्यालय सिन्धुलीका प्रमुख गोबिन्द राज काफ्लेको अध्यक्षता तथा प्रमुख जिल्ला अधिकारी लीला प्रसाद शर्माको प्रमुख आतिथ्यतामा सवारी चालकहरुको प्रतिवद्धता कार्यक्रमको उद्धघाटन गरिएको जिल्ला प्रहरी कार्यालय सिन्धुलीले जनाएको छ ।
सवारी चालकको प्रतिबद्धता कार्यक्रम अन्तर्गत सवारी चालकहरूलाई सिकाउने, अनुभव गराउने, जानकारी गराउने, प्रतिवद्धता गराउने र आफ्नो सुरक्षा बारे सचेतनामूलक जानकारी गगराइने छ । सार्वजनिक सवारी साधनहरूको हकमा जिल्ला स्थित बसपार्कहरुमा रहेका सवारी चालकहरुलाई र मोटरसाइकल चालकहरूको लागि राजमार्गमा सुरक्षित तथा उपर्युक्त स्थानमा चालकहरूलाइ ट्राफिक प्रहरीहरू बाट भेला गरी निरन्तर रूपमा जानकारी गराइने जनाइएको छ ।
कार्यक्रममा प्रमुख जिल्ला अधिकारी शर्माले सडक सुरक्षा र यात्रु सुरक्षाको विषय ३६५ दिन कै विषय भएकाले चाडपर्वका अवसरमा सडक सुरक्षा र यात्रु सुरक्षाको विषय झनै संवेदनशिल रहेको बताउनुभएको छ ।
कार्यक्रममा जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेले चाडपर्व लाई लक्षित गरेर दुर्घटना न्युनिकरण अभियान चलाईएकाले सरोकारवाला पक्ष सबैलाई यस अभियानमा सहयोग गर्न आग्रह गर्नुभएको छ ।
