सिन्धुली। नवज्योति बहिरा माध्यमिक विद्यालयमा विभिन्न कक्षामा अध्ययनरत बहिरा बिद्यार्थीहरुलाई सीपमूलक तालिम सञ्चालन गरी व्यवसाय सञ्चालन गर्न सामाग्री हस्तान्तरण गरिएको छ । प्लान इन्टरनेशनल नेपालको आर्थिक सहयोगमा सिड्स नेपाल सिन्धुलीको साझेदारी तथा कमलामाई नगरपालिका, सुनकोशी गाउँपालिका र मरिण गाउँपालिकाको समन्वयको आधारमा पहिलो चरणमा सामाग्री हस्तान्तरण गरिएका हो ।
तिन वटा पालिकाका ६ जना बहिरा विद्यार्थी छनौट गरी दक्ष युवा परियोजना कार्यक्रम अन्तर्गत दालमोठ, भुजिया, आलुचिप्स, मःमः, चाउमिन, समोसा, पापड बनाउने तालिम सम्पन्न भइ सकेपछि उनीहरु ६ जनाले नै व्यवसाय सञ्चालन गर्न चाहेकोले खाजा पसल खोल्न सामाग्री सहयोग गरिएको दक्ष युवा परियोजनाका परियोजना अधिकृत विक्रम केसीले बताउनुभयो ।
त्यस्तै हाल कक्षा ११ र १२ मा अध्ययनरत उक्त नव उद्यमी बहिरा विद्यार्थीहरुले कक्षा १२ को अध्ययन पश्चात सिन्धुलीमै परिवारको वा अन्य सहयोगी साथीहरुको सहयोगमा व्यवसायलाइ फास्ट फुड रेस्टुरेन्टको रुपमा विकास गरी अपाङ्गता भएका व्यक्ति र अपाङ्गता नभएका व्यक्ति दुवैलाइ रोजगारी प्रवर्दन गर्ने बताउनु भयो । अध्ययन पश्चात घर गएर एक्लिनु भन्दा यही सदरमुकाम सबै साथीहरुको सहयोगमा व्यवसायको वृद्दि र विकास गरी भविष्यमा एउटा ब्रान्डको रुपमा स्थापित गरी राष्ट्रिय तथा अन्तर्राष्ट्रिय रुपमा पहिचान गराउन कोशिस गर्ने समेत बहिरा नव उद्यमी बालकुमारी क्षेत्रीले बताउनुभयो ।
यस अघि तालिम मात्र दिने र व्यवसाय सञ्चालन गर्न कुनै पनी सामाग्री वा अन्य व्यवस्थापकीय सहयोग तालिम प्रदायक संस्थाबाट हुने व्यवस्था थिएन । तर यो तालिम सम्पन्न भए पश्चात सहभागीहरुलाइ व्यवसाय गर्न जुन सहयोग भएको छ यसले विद्यार्थीहरुमा थप हौसल्ला मिलेको र आगामी दिनमा अन्य विद्यार्थीहरु पनी तालिम लिइ व्यवसाय गर्न आकर्षित भएको विद्यालका प्रधानाध्यापक बिजय तामाङ्गले बताउनुभयो ।
पढाइ सँगै सीप कमाइ आर्जन हुने भएकाले यस्ता कार्यक्रमले बहिरा अपाङ्गता भएका व्यक्ति मात्रै नभइ समग्र अन्य विद्यार्थीहरुलाइ समेत फाइदा हुने र विद्यार्थीहरुमा व्यवहारिक, नैतिक, आर्थिक, उद्यमशिलता आदि सम्पूर्ण क्षमताको विकास भइ समतामूलक समाज निर्माणमा गर्नमा समेत टेवा पुग्ने प्रधानाध्यापक तामाङ्गले बताउनुभयो ।
