सिन्धुली । सिन्धुलीको कमलामाई नगरपालिका ६ लाई बालमैत्री वडा घोषणा गरिने भएको छ । बालमैत्री वडा घोषणाको लागि सबै सूचकहरु पूरा गरिसकेकाले कमलामाई नगरपालिका ६ लाई भदौ २९ गते शनिबार बालमैत्री वडा घोषणा गर्न लागिएको हो ।
वडा नं. ६ ले बालमैत्री स्थानीय शासन राष्ट्रिय रणनीति २०६८, कार्यान्वयन कार्यविधि २०६८, बालमैत्री स्थानीय शासन घोषणा कार्यविधि २०७९ ले निदिष्ट गरेको सवै तहगत खुड्कीलाहरु, सूचकहरु र मापदण्ड हरु पुरा गरेकाले वडा लाई बालमैत्री घोषणा गर्न लागिएको कमलामाई नगरपालिका ६ का वडा अध्यक्ष उज्जवल कुमार थापाले जानकारी दिनुभयो । कमलामाई नगरपालिका ६ लाई यस अघिनै बालमैत्री घोषणा गर्न प्रयास गरिएपनि सदरमुकामको वडा भएकाले बालबालिका सम्बन्धी दिनदिनै नयाँ घटनाहरु आउने भएकाले समस्या भएको उहाँले बताउनुभयो ।
भदौ २९ गते प्रतिनिधी सभा सदस्य श्याम कुमार घिमिरेको प्रमुख आतिथ्यतामा कमलामाई नगरपालिका ६ लाई बालमैत्री वडा घोषणा गरिने भएकाले सम्पूर्ण जनप्रतिनिधी, राजनैतिक दलका प्रतिनिधी, बुद्धिजिवी, समाजसेवि, टोल विकास संस्थाका प्रतिनिधी, बालक्लव, शिक्षक बिद्यार्थी, पत्रकार लगायत सम्पूर्णलाई यस अभियानमा सहभागी भइदिन वडा सचिव जगदिश विक्रम कार्कीले आग्रह गर्नुभएको छ ।
