सिन्धुली । सिन्धुलीको फिक्कल गाउँपालिका वडा नम्बर–५ स्थित बुद्धचित्त मालाको दाना टिप्ने विषयमा भएको विवादमा एक जनालाई पक्राउ गरिएको छ । फिक्कल गाउँपालिका वडा नम्बर–१ का वडा अध्यक्ष होमबहादुर सुनुवारसँग करार सम्झौता गरेर किनेको बुद्धचित्तको दाना अर्को समूहले ‘लुटेको’ भन्दै आर्यन खतिवडाले प्रहरीमा जाहेरी दिएका थिए । खतिवडाले दिएका जाहेरीको आधारमा घटनामा संलग्न आरोपमा काभ्रे घर भएका राकेश तामाङलाई भदौ २ गते पक्राउ गरेर ७ दिनको म्याद थपी डाँकाचोरी तथा लुटपाट मुद्दामा अनुसन्धान गरिएको सिन्धुलीका एसपी गोविन्द राज काफ्लेले जानकारी दिनु भयो ।
बारा घर भएका आर्यन खतिवडाले मालाको दाना आफूले ६५ लाखमा खरिद गर्ने गरी करार सम्झौता गरेको बताए । साउन १ मा अर्को समूहले जबर्जस्ती दाना टिपेका हुन् । रुख धनी होम बहादुर सँग सुरुमा काभ्रेको तेमाल गाउँपालिका घर भएका पुष्पलाल दोङले खरिद सम्झौता गरेका थिए ।
दोङबाट पुनः राकेश तामाङ, सुवर्ण लामा र देवलाल तामाङले दाना टिप्ने गरी करार गरेका थिए । त्यसपछि राकेश सहितका ३ जनाबाट आफूले दाना खरिद गर्ने सम्झैता गरेको जाहेर वाला खतिवडाले बताए । सो मुद्दामा साउन २१ मा सिन्धुली जिल्ला अदालतले ३ जना बिरुद्ध पक्राउ पुर्जी जारी गरेको थियो ।
